|
|
|
 |
|
|
|
Kliek foto vir groter weergawe |
Teddiebere:
Baie minlike speelgoed vir ure se genot Teddiebere is
oulike sagte speelgoed wat sedert die vroeg 1900's gewildheid
begin kry het. Die meeste van ons het, as kind, 'n ou
teddietjie of twee gehad wat ure se speelgenot en
vertroosting gegee het.
Deesdae is daar derduisende soort speelgoed-bere in 'n
magdom van groottes, kleure, vorms en tekstuur. Die grootste
teddie is 55 voet 4 duim en lê rustig op sy rug en slaap.
Die kleinste teddiebeertjie is so piep-klein dat dit op 'n
mens se duimnael kan inpas, maar net 5mm. |
|
| Daar is bere wat in massa vervaardig word, maar ander is uniek
en met groot sorg handgemaak. Mens sien van die tipiese ouderwedse
teddiebere tot meer moderne beertjies in pragtige klere. Selfs
koala- en pandabere word soms gemaak as deel van die
Teddiebeer-brigade. Hulle kan gemaak word van materiaal, gebrei en
gehekel word van gewone, Angora-, alpakkawol of hekelgaring en ander
word selfs van symateriaal of sagte leer gemaak. Daar is deesdae ook
sommiges wat suiwer uit herbenutte materiaal gemaak word. |
Kliek foto vir
groter weergawe |
|
Teddiebere se gewildheid strek heinde en verre en is te siene op alle
terreine van die lewe. So is daar byvoorbeeld teddiebeer-byeenkomste,
-webwerwe, -soekenjins, -museums en natuurlik talle gewilde boeke wat
teddies as hoofkarakters gebruik. Daar is films en video's oor hulle,
geskenk- en muurpapier wat speelgoedbeertjies vertoon en selfs
baba-eetgerei, klere en pette en hoede met beertjiepatrone. Kinderkamerversierings,
linne, dekens en gordyne kan maklik
opgespoor word in winkels. Praat nie eers van die tonne verjaardag- en
ander herdenkings- en geleentheidskaartjies nie! Net soos in Amerika
waar daar ongeveer 2,5 miljoen versamelaars is, is die teddiebeer reg oor
die wêreld nou 'n baie gewilde speelding. |
|
Kliek foto vir groter weergawe |
Soms dink mense dat die oulike koala bygedra
het tot dié speelding se ontstaan. Dit is egter hoofsaaklik
twee persone wat die teddiebeer-speelding prominensie gegee
het en bygedra het tot hul groot gewildheid. Die een was
'n Duitse ontwerper, Richard Steiff in samewerking met sy
tante Margarete Steiff, 'n gestremde dame wat nuttig met
naaldwerk was. In 1899 het
Margarete Steiff 23 ontwerp-patente van sagte speelgoed
geregisteer, waarby onder andere ook 'n beertjie ingesluit
was. |
|
|
Steiff en sy tante het in 1902 'n prototipe gemaak en in Maart 1903 was
die pragtige speelgoedbeertjie vrygestel by die Leipzig
Speelgoed-uitstalling. Daar het 'n Amerikaner by name Hermann Berg, van
'n groot New Yorkse Speelgoedmaatskappy, die oulike speelding raakgesien
en 'n redelike bestelling geplaas. Dit is kort daarna met 'n nog groter
bestelling opgevolg. Dít het die teddiebeer op sy weg van gewildheid
geplaas. Die ander persoon wat 'n bydrae tot die teddiebeer se
gewildheid gehad het, was die Amerikaanse President,Theodore Rooseveldt,
na wie die speelding vernoem is. Teddiebere het in Amerika ontstaan na
aanleiding van 'n karikatuurprent van Rooseveldt wat 'n beer in die
agtergrond vertoon. Die spotprent het in November 1903 verskyn en kort
daarna het Morris Michtom, wat deur die prent geïnspireer was, 'n sagte
speelgoedbeertjie ontwerp wat hy "Teddy's bear" genoem het. Hy het die
beertjies in sy lekkergoedwinkel begin verkoop, maar het sowat 'n jaar
daarna die speelgoedmaatskappy Ideal Novelty and Toy Company, gestig,
waar die teddiebeertjies gemaak en verkoop was. |
| Die beertjies het deesdae ook ander nut. Sommige hulppersoneel
soos paramedici en brandweerpersoneel het begin om beertjies aan
kindertjies te gee wat in ongelukke betrokke was. In Kanada word daar na
sekere groot
hokkiewedstryde, beertjies op die skaatsbaan gegooi deur
die toeskouers, waarna dit dan alles as geskenke na weeshuise en ander
welsynsinstansies gekanaliseer word. |
Kliek foto vir
groter weergawe |
|
Ja, ou Teddie is nog oral aan die voorfront van sake. Wie ken nie die
bekende ou liedjie: "The Teddy Bear's Picnic" nie? 'n Vrolike opgeruimde
liedjie. Teddiebere of dan "Teddy bears", bly baie geliefd en word nou
nog meer as ooit gemaak, gekoop en versamel. |
| |
|
