Die mens en sy dinge. Pretparke: 'n Gillende ervaring

Pretparke: 'n Gillende ervaring

Die sukses van pretparke is waarskynlik te wyte aan die talle elemente wat dit inkorporeer. Dit verskaf vermaak, maar anders as met 'n gewone speelgrond, waar net kinders op die swaaie, klimrame en gly-en wipplanke speel, is daar by die pretpark ry-apparaat en ander vermaak vir volwassenes ook.

Die idee van die pretpark is baie oud en het al in die 15de eeu na vore begin kom. Dit het moontlik sy oorsprong by antieke en middeleeuse feeste en handelskoue.

Kliek foto vir
groter weergawe

Die ou tipe kermisse of dorpsfeeste, waar vuurwerke, ritte, kosstalletjies, danse, opvoerings en poppespel raakgeloop kon word, was die saamkomplek van talle gemeenskappe, waar nuus, goedere en inligting uitgeruil en gedeel was.

'n Groot versameling van byeenkomste het almal maar eienskappe van die pretpark-idee. Dit sluit in feeste, skoue, karnavalle, kermis, fête en selfs vlooimarkte. Sulke geleenthede is gewoonlik gehou kort na oestye of om een of ander belangrike geleentheid te vier. Die doel van al sulke byeenkomste is om die gemeenskap die geleentheid te gee om ware te ruil, te bemark, te verkoop en bekend te stel. Die res van die bedrywighede op die kermisterrein is dan tot vermaak van besoekers. Een van die oudste pretparke is Bakken (Dyrehavsbakken) in Kopenhagen, wat in 1583 geopen het.

Kliek foto vir groter weergawe

Deesdae het die gewone ou pretpark geweldige gedaantewisselings ondergaan, omdat al hoe groter ryapparate vir pretritte beskikbaar word en nog steeds ontwikkel word. In die 1800's het pretparke begin gewild raak in Amerika. Gedurende die Chicago-wêreldfees, wat ter viering van Columbus se ontdekking van die "nuwe wêreld" gehou was, is die reuse wiel (ferris wheel), bekend gestel. Dié eerste reuse wiel, wat 80 meter of dan 264 voet hoog was, was ontwerp en gebou deur George Washington Gale Ferris, Jr. Variasies op die gewone ferriswiel was die dubbel- en trippelwiele. Die gebruik van 'n reuse wiel of kermiswiel was dadelik gewild en bly nogsteeds een van die belangrike ritte by pretparke. Ander ryapparate is mallemeulens, stoelrondomtalies en tuimeltreine.

Sommige pretparke, wat rondom die idee van 'n tema geskep word, is ook al hoe meer aan die orde van die dag. Van die mees bekendste tema-pretparke is sekerlik die reeks Disneyparke, wat rondom die verskillende temas van Disney se fantasie-karakters uit sy films begin is. Six Flags in Texas, is nog so 'n tema-pretpark, asook Bobbejaanland in België.

Deel van die toenemende gebruik van die pretpark-idee, vind ook deesdae beslag in die reuse winkelsentrums, waar pretritte en fantasie-areas deel van die res van die omgewing vorm. 'n Goeie voorbeeld daarvan is die West Edmonton Mall in Kanada, waar die pretpark 'n deel vorm van die totale inkopie-ervaring.

Kliek vir groter weergawe

Ander noemenswaardige pretritte wat deel vorm van pretparke, is die rondomtalie ("merry-go-round"). Dit is veral kleuters en jong kindertjies wat die perdjies, wat so draai en draai om 'n spilpunt, baie geniet.

En wat sou 'n pretpark nou wees sonder die groot swaaie, die waterglybane, die mini-gholfbane, die tuimeltrein (roller coaster), die spookhuis en grappige spieëls? Om nie eens te praat van die pragtige veelkleurige ballonne, grapmaker-narre, gooispeletjies, worsbroodjies, springmielies en spookasem nie!

Lees meer by:

www.merrygoroundmuseum.org

Ferris Wheell

Ps 118:24 Dit is die dag wat die HERE gemaak het; laat ons daaroor juig en bly wees.

Ps 118:24 This is the day which the LORD hath made; we will rejoice and be glad in it.